A ESMU Municipal de Ortigueira incrementa as solicitudes de matrícula un 78% este curso

• En consecuencia celebrará unhas xornadas de portas abertas hoxe 19 e mañá 20 de setembro para dar a coñecer o centro ás familias.

O Concello de Ortigueira está de parabén tras rexistrar un incremento de case un 80% nas solicitudes de matrícula da Escola de Música Municipal de Ortigueira (ESMU) para o curso 2024-2025. Este notable crecemento reafirma a aposta do municipio polo fomento da educación musical e a cultura en xeral, consolidando á ESMU como un referente educativo e artístico na comarca. Para celebrar este éxito e achegar a música a toda a comunidade, a escola organizou unha xornada de portas abertas hoxe 19 e mañá 20 de setembro, entre as 16:00 e as 19:00 horas, na que se convida aos veciños e veciñas a coñecer de preto as instalacións e o programa formativo da escola.
A concelleira de Cultura, Ana Cartelle, expresou a súa satisfacción polos resultados, resaltando a relevancia do traballo conxunto entre o equipo docente e as familias para fomentar o interese musical na localidade. “Este aumento do 78% na matrícula é un reflexo do compromiso da cidadanía coa música. Queremos seguir crecendo e, por iso, organizamos esta xornada de portas abertas, para que máis persoas descubran a nosa Escola de Música e anímense a formar parte desta comunidade tan vibrante”, afirma Cartelle.
A xornada permitirá aos asistentes realizar un percorrido polas instalacións, coñecer aos profesores e experimentar cos diferentes instrumentos que se ensinan na ESMU. A oferta educativa inclúe unha ampla gama de opcións, como guitarra, piano, frauta e saxofón, ademais de clases de linguaxe musical adaptadas a todas as idades, desde nenos ata adultos.
Outras actividades culturais en setembro
Ademais da xornada de portas abertas, o centro preparou outras actividades durante o mes:
O martes 24 de setembro, celebrarase a presentación do novo taller de “Música e Movemento” de 16:00 a 16:30 horas. Posteriormente, terá lugar a elección de horario para as diferentes especialidades: vento-metal ás 18:30 horas, percusión ás 19:00 horas e piano ás 19:30 horas.
O mércores 25 de setembro comezarán as clases nas materias teóricas para todo o alumnado, así como nas especialidades de piano, percusión e vento-metal. As datas de inicio das clases nas restantes especialidades instrumentais (guitarra, vento madeira, canto, gaita…) anunciaranse ao seu debido tempo.
Para culminar este trimestre, as agrupacións da Escola -Banda, Coro e Combo- ofrecerán un concerto o 20 de decembro na Igrexa Parroquial de Santa Marta. Este evento, titulado “A Divina Comedia”, estará inspirado na obra homónima de Dante.
Cartelle destaca a importancia destas actividades como parte dunha estratexia integral para promover o acceso á cultura e a educación en Ortigueira. “A música non só é unha arte, é unha ferramenta para o crecemento persoal e colectivo. Con estas iniciativas, queremos seguir impulsando a vida cultural do municipio e achegar a música a todos os recunchos da nosa comunidade”, subliña a concelleira.
O Concello convida a toda a cidadanía a participar nas actividades programadas para setembro, reafirmando o seu compromiso co desenvolvemento cultural e educativo de Ortigueira.